Zəhmət insanı ucaldan, ona cəmiyyətdə hörmət və şərəf qazandıran ən böyük dəyərdir. Azərbaycan tarixi öz fədakar əməyi ilə adını tarixə yazdırmış, gələcək nəsillərə örnək olmuş şəxsiyyətlərlə zəngindir. Belə fədakar və fəxri insanlardan biri də tanınmış əmək qabaqcılı və məşhur üzümçü Tamara Bəbir qızı Heydərovadır. Tamara Bəbir qızı Heydərova 1927 – ci ildə Qərbi Azərbaycanın Zəngəzur mahalında ( Ermənistan SSR) Gorus rayonunun Şamsız kəndində anadan olub. Onun gənclik və yetkinlik illəri çətin lakin şərəfli dövr olmuşdur. O, erkən yaşlarından torpağa bağlanmış, əməksevərliyi və işinə məsuliyyəti ilə seçilmişdir. Tamara Heydərovanın atası azərbaycanlılara divan tutan iki ermənini öldürdüyünə görə həbs edilir onun ailəsi Ağdam rayonunda məskunlaşır. Tamara Bəbir qızı Heydərova Ağdam rayonunda Natəvan adına üzümçülük sovxozunda hektarç ı işləyir və 1952 - ci ildə üzümçülük sahəsində yüksək əmək göstəricilərinə nail olaraq “Şərəf nişanı” ilə təltif olunmuşdur. 1948-1958-ci illərdə manqabaşçısı olan Tamara Heydərova 1953-cü ildə yüksək üzüm məhsulu götürdüyünə görə SSRİ Ali Soveti Rəyasət Heyətinin fərmanı ilə “Sosialist Əməyi Qəhrəmanı” adına layiq görülmüşdür. Xəstəliyinə görə ağır fiziki işdə işləyə bilmədiyindən 1962 - ci ildə Ağdam rayonunda ət kombinatında çalışır. Tamara Heydərova 1964-cü ildən Kommunist Partiyasının üzvü olmuşdur. Onun sinəsini “Lenin ordeni”, “Qızıl ulduz” medalı ilə “Əmək igidliyinə görə”, Ümumittifaq Kənd Təsərrüfatı sərgisinin böyük qızıl, böyük gümüş, “Rəşadətli əməyə görə” medalları bəzəyir. Azərbaycan SSR- in 50 illiyi. Azərbaycan KP MK-nın respublika Ali Sovetinin, Nazirlər sovetini n təbrikini almışdır. Respublika, rayon sovxoz təşkilatlarının fərmanları, təşəkkürləri və mükafatları ilə dönə -dönə təltif olunmuşdur. Lakin öz doğma elindən uzaq düşüb Ağdamda məskunlaşan Tamara Heydərova 1993 - cü ildə mənfur ermənilərin Ağdam şəhərinə hücum etməsi nəticəsində şəhəri tərk etmək məcburiyyətində qalır və o, Sumqayıt şəhərində məskunlaşır. Adı Azərbaycan Sovet Ensiklopediyasında olan Tamara Heydərova 02. 10. 2002 - ci ildən Azərbaycan Respublikası Prezidentinin fərdi təqaüdçüsüdür. O, 2017 - ci il yanvarın 18 - də 90 yaşında vəfat etmişdir. Tamara Bəbir qızı Heydərova vəfat etsə də onun qoyduğu irs və şərəfli ömür yolu unudulmamışdır. Tamara xanımın timsalında görürük ki, insan hansı sahədə çalışırsa çalışsın, öz işinə sevgi və dürüstlüklə yanaşdıqda mütləq zirvələrə ucalır. Torpağa fədakarlıqla xidmət edən bu fədakar qadının xatirəsi hər zaman hörmətlə anılacaqdır.
Məlumat: Azərbaycan Sovet Ensiklopediyası, Əli Vəliyevin “Durna qatarı” kitabından götürülmüşdür. Bəzi məlumatlar isə Tamara xanımın qardaşı oğlu Elxan Əfqan oğlu Heydərovdan alınmışdır.
Müəllif: Gorus Rayon İcmasının üzvü İnarə Şahsuvar qızı Musayeva